غدًا لا تبدأ مباراة فقط… غدًا تبدأ الحكاية! حين يدخل الأزرق الكويتي أرض الملعب لمواجهة شقيقه المنتخب السعودي في افتتاح مشواره بكأس خليجي ٢٧ ، ما نبي بس تسعين دقيقة عابرة. نبي صوت الكويت يُسمع من الليلة الأولى. نبي بطولة تعرف إن الأزرق حضر ينافس مو يشارك مثل ما صرح به ايضا رئيس اتحاد الكرة الشيخ احمد اليوسف ..
صحيح المواجهة أمام صاحب الارض والجمهور ، والافتتاح دائمًا ثقيلة .!!
بس سؤال مهم متى كانت كأس الخليج بطولة للحسابات الباردة؟
هذي بطولة صنعت مجدها من التحدي، من الصيحات، من العرق، من الشرارة اللي تولع من أول صافرة.
رسالتي للاعبين واضحة: ” أشلعوا ” سقف التحدي! احترموا الخصم… بس لا تهابوه. احترموا جماهيره، احترموا ملعبه، بس تذكروا أن وراكم شعب كامل يبي يشوف منتخب شرس، عنيد، يقاتل حتى آخر ثانية. نبي الأزرق اللي إذا طاح قام، وإذا انحصر قاتل، وإذا حصلت له نص فرصة تمسك فيها وكأنها نهائي البطولة .
من جدة لازم تولع ، نبي أول مباراة تخلي الخليج كله يقول: البطولة اشتعلت! السعودية تبي تعلن قوتها وامكانيات لاعبينهم الغارقه عن لاعبينا ، والكويت تبي تقول إن تاريخها مو مجرد صور قديمة. والاربعاء ما نطلب المستحيل، نطلب الرجولة الكروية، القميص المبلول بالعرق، الخطوة اللي ما تتردد، والقلب اللي ما يستسلم.
يا أزرق… ادخلها مقاتل للفوز فيها ولا تنظر إلا للشعار على صدرك.
الاربعاء تبدأ الرحلة، ونبيها زرقاء تلهب الناظرين .
